Hafan Busnesau newydd Sut mae’n gweithio

Sut mae’n gweithio

Efallai fod gennych chi’r datrysiad mawr nesaf o ran seiberddiogelwch, ond dim y llwybr clir i’w ddatblygu.

Dyna lle mae ein Rhaglen Datblygu Menter yn berthnasol. O gyllido ac adeiladu tîm i ddilysu a lansio, rydym yma i’ch helpu chi i fynd ymhellach, yn gyflymach.

Siaradwch â ni

Sut rydym yn gwireddu eich gweledigaeth

Cyd-fynd â her

Gwnewch yn siŵr bod eich syniad yn cysylltu ag un o’n meysydd her blaenoriaeth. Mae’r rhain yn cael eu siapio gan anghenion go iawn ar draws diwydiant, diogelwch gwladol, a Llyfr Problemau NCSC.

Cynnig eich syniadau

Dywedwch wrthym pam eich bod yn awyddus i ddatblygu a pham mae hyn yn bwysig. Gallwch wneud cais yn ysgrifenedig neu anfon fideo byr, beth bynnag sy’n gweithio i chi. Mae’r cyfnod ymgeisio ar agor drwy’r flwyddyn.

Gwerthusiad gan Arbenigwr

Rydym yn asesu eich syniad gyda mewnbwn gan bartneriaid yn y diwydiant ac arbenigwyr technegol. I lwyddo, mae angen i’ch syniad fynd i’r afael â her yn glir, dod â rhywbeth newydd, a bod â’r potensial i dyfu.

Cael eich Dewis

Dim ond y syniadau mwyaf addawol sy’n cael eu derbyn ar ein rhaglen 12 mis. Os cewch eich dewis, byddwn yn eich partneru â thîm sy’n cael ei recriwtio gan Sefydliad Alacrity, gan ddod â sgiliau fel dealltwriaeth fasnachol a datblygu busnes.

Datblygu eich Tîm

Byddwn yn cydosod tîm menter newydd o amgylch eich syniad, a nhw fydd eich cyd-sylfaenwyr. Gyda’ch gilydd, byddwch yn siapio eich datrysiad, yn ei brofi yn y byd go iawn, ac yn adeiladu busnes sy’n barod i’w lansio.

Dechrau Adeiladu

Dros 12 mis, byddwch yn mynd â’ch syniad o’r cysyniad i’r lansiad – gyda chyllid, strwythur, mentora, a momentwm ar bob cam.

Beth ydych chi’n ei gael gennym ni?

Byddwn yn rhoi’r strwythur, y cymorth, a’r adnoddau i chi droi eich syniad yn fusnes go iawn, gyda chefnogaeth tîm a rhwydwaith dibynadwy. Dyma beth sy’n cael ei gynnig:

Tîm llawn: Byddwch yn cael eich paru â chyd-sylfaenwyr sy’n dod â sgiliau masnachol, sgiliau technegol, a sgiliau cynnyrch
£1,750 y mis yn ariantal: Cymorth ariannol er mwyn i chi allu canolbwyntio ar adeiladu.
Man gweithio mewn hyb i fentrau newydd: Mynediad dyddiol at amgylchedd gwaith cydweithredol yng Nghasnewydd/Caerdydd.
Mentora gan arbenigwyr yn y diwydiant: Cefnogaeth gan sylfaenwyr, buddsoddwyr, arweinwyr technegol, a chynghorwyr masnachol profiadol.

O ddiffinio cwmpas eich cyfle a dilysu eich syniad i adeiladu eich Cynnyrch Sylfaenol Hyfyw (MVP) a chyflwyno eich cynnig er mwyn cael buddsoddiad, byddwn yn eich cefnogi ar bob cam. gyda’r strwythur, yr adnoddau, a’r gefnogaeth i adeiladu busnes newydd o’r gwaelod i fyny. Byddwch hefyd yn ymuno â chymuned ehangach o sylfaenwyr, ymchwilwyr, a gosodwyr heriau sy’n siapio dyfodol seiberddiogelwch.

Beth sydd ei angen arnom ni gennych chi?

Mae angen eich chwilfrydedd a’ch ymroddiad arnom ni, a’r angerdd i wneud rhywbeth real. Does dim angen cyd-sylfaenydd na chynllun busnes caboledig arnoch chi, dim ond problem glir a’r egni i’w datrys.

Amser a ffocws: Bydd angen i chi ymrwymo’n llawn amser a gweithio gyda’ch tîm yn ein hyb mentrau newydd yng Nghasnewydd/Caerdydd.
Parodrwydd i ddysgu: Byddwch yn barod i brofi tybiaethau, cael adborth, ac addasu’n gyflym.
Meddylfryd aelod da o dîm: Byddwch yn gweithio â chyd-sylfaenwyr sy’n cael eu recriwtio ar gyfer eich syniad. Mae cydweithio’n allweddol.

Bydd angen i chi drwyddedu unrhyw eiddo deallusol cefndirol sydd gennych, er mwyn i’ch tîm allu adeiladu arno. Bydd unrhyw eiddo deallusol newydd a ddatblygir yn ystod y rhaglen yn cael ei ddal gan yr Hyb a’i ddychwelyd i’ch cwmni ar ddiwedd y 12 mis, yn gyfnewid am gyfran ecwiti fach i gydnabod y cymorth, y cyllid, a’r seilwaith rydym wedi’u darparu i’ch helpu i ddatblygu.

Y meysydd her

Rydym yn awyddus i ganfod, datblygu a dangos datrysiadau arloesol yn y meysydd a amlinellir isod. Mae’r meysydd her wedi cael eu dewis i gyd-fynd yn fras â’r heriau a nodwyd drwy ddeialog â phartneriaid a rhanddeiliaid yn y diwydiant, a thrwy lyfr problemau’r Ganolfan Seiberddiogelwch Genedlaethol.

I ddeall y mathau o broblemau y mae arweinwyr ein diwydiant yn eu gweld, edrychwch ar CyberSight25 lle mae Prif Swyddogion Diogelwch Gwybodaeth, cyfarwyddwyr diogelwch, ac arbenigwyr yn amlinellu’r heriau mwyaf y mae angen i’r gymuned seiber eu datrys nesaf.

Diogelwch y Gadwyn Gyflenwi

Gall achosion diweddar o feddalwedd wystlo, er enghraifft, ledaenu’n gyflym drwy systemau a rhwydweithiau TG, gan dynnu gweithrediadau i lawr a chael effaith drwy gadwyn gyflenwi sefydliadau rhyngddibynnol. Mae’n anodd rhagweld hyn ac mae angen datrysiadau newydd i ddeall rhyngddibyniaethau yn ogystal â rhagweld a chyfrifo effaith methiant ar systemau a chadwyni cyflenwi ehangach.

Cydymffurfio Awtomataidd

Mae sefydliadau’n aml yn ceisio datblygu a gweithredu polisïau seiberddiogelwch ond does ganddyn nhw ddim datrysiadau addas i olrhain ac adrodd ar eu sefyllfa diogelwch go iawn o ran y polisïau hyn. Mae hyn yn broblem benodol i dechnoleg weithredol mewn sectorau fel ynni, cyfleustodau, a gweithgynhyrchu. Mae angen datrysiadau newydd i fodelu a mapio prosesau a’r defnydd o dechnoleg yn unol â disgwyliadau – yn fewnol, ac o ran arferion gorau/rheoleiddio gan gynnwys CAF/HSE OG86 fel enghreifftiau. Nid yw cael data yn ddigon. Mae angen i’r datrysiadau hyn roi ‘cyngor’ i bobl ar lawr gwlad, yn ogystal â chefnogi penderfyniadau ynghylch ble a sut i fuddsoddi mewn gwelliannau seiberddiogelwch.

Amddiffyniad Seiber Awtomataidd

Drwy ddatblygu deallusrwydd artiffisial cynhyrchiol, rydym yn mynd i weld dyfodol lle gall ymosodiadau esblygu ar eu pen eu hunain ar ôl iddyn nhw ddigwydd, gan ddysgu’n barhaus sut mae dod o hyd i wendidau seiber a manteisio arnyn nhw. Bydd angen datrysiadau newydd i ddysgu sut mae amddiffyn yn erbyn yr ymosodiadau hyn. Yn yr un modd, rydym wedi gweld gemau strategol yn cael eu dysgu gan ddefnyddio systemau fel datblygiadau AlphaGo DeepMind – bydd angen i hyn ddigwydd yng nghyd-destun systemau digidol. Rydym yn gweld y galw am hyn gyda buddsoddiadau mewn fframwaith Amddiffyniad Seiber ar gyfer Atgyfnerthu Awtomataidd DSTL, ac mae angen cadwyn gyflenwi gref o gwmnïau ar y DU sy’n gallu cyfrannu at hyn.

Rheoli Meddalwedd Wystlo

Mae meddalwedd wystlo yn lledaenu’n gyflym, a dangosodd WannaCry i ni sut y gall hyn effeithio ar wasanaethau hanfodol fel y GIG yn gyflym iawn ac yn ddirybudd. Cyn i ni gyrraedd pwynt lle mae realiti amddiffyniad seiber cwbl awtomataidd yn cael ei ddatblygu, mae rhai camau cyflym y gallwn eu cymryd i reoli meddalwedd wystlo mewn ffordd awtomataidd – drwy flocio / lladd / atal prosesau sy’n cael eu hystyried yn faleisus. Mae angen i ddatrysiadau ganfod meddalwedd wystlo yn gynnar, a stopio’r difrod – heb amharu ar fusnes ar yr un pryd.

Technoleg weithredol

Y cyfuniad o galedwedd a meddalwedd sy’n monitro ac yn rheoli prosesau ffisegol, fel peiriannau diwydiannol a seilwaith. Mae seiberddiogelwch Technoleg Weithredol yn canolbwyntio ar ddiogelu’r systemau hanfodol hyn rhag bygythiadau seiber a allai effeithio ar ddiogelwch, cynhyrchiant, a seilwaith.

Diogelu busnesau bach a chanolig a dinasyddion

Mae hyn yn golygu diogelu asedau digidol a gwybodaeth sensitif busnesau bach a chanolig yn ogystal ag unigolion rhag ymosodiadau seiber. Mae’n cynnwys rhoi mesurau diogelwch ar waith i atal mynediad heb awdurdod, torri diogelwch data, a bygythiadau seiber eraill.

Ymateb i ddigwyddiadau ar gyfer Busnesau Bach a Chanolig a dinasyddion

Y dull trefnus a ddefnyddir i reoli a lliniaru’r sefyllfa ar ôl digwyddiad seiberddiogelwch. Ar gyfer busnesau bach a chanolig a dinasyddion, mae ymateb i ddigwyddiadau yn cynnwys strategaethau i ganfod, rheoli, dileu, ac adfer ar ôl digwyddiadau seiber, gan leihau difrod posibl a sicrhau adferiad cyflym.

Amgryptio Rhyngrwyd Pethau diwydiannol

Defnyddir amgryptiad gyda’r data a’r cyfathrebu o fewn dyfeisiau’r Rhyngrwyd Pethau Diwydiannol (IoT). Mae hyn yn sicrhau bod data sy’n cael ei drosglwyddo rhwng dyfeisiau a systemau diwydiannol cydgysylltiedig yn aros yn gyfrinachol ac yn ddiogel, gan amddiffyn rhag mynediad heb awdurdod ac ymyrraeth.

Barod i wneud cais?

Dechrau eich cais